تاند(جمعه، د جوزا ۶ مه) امريکا د متحده ايالاتو چين تورن کړی، چې د نړیوال نظم د خرابولو لپاره یې تغییر نه منونکي پلانونه پيل کړي او په جدي ډول یې په دې اړه هڅې روانې دي.
د دغه هېواد د بهرنيو چارو وزير انتوني بلینکن پرون وویل، چې بيجينګ د نړيوال نظم د ټينګښت پر وړاندې تر ټولو لويې ننګونې رامنځته کړي دي.
د هغه په وينا، چين يوازينی هېواد دی، چې هم غواړي په نړۍ کې شته نظم بدل کړي او هم په اقتصادي، ديپلوماتيک، پوځي او ټيکنالوژيکه برخه کې د دې کار د سرته رسولو وسه لري.
د امریکا د بهرنیو چارو وزیر دا هم وويل، چې روانه لسيزه به د نړۍ هېوادونو ته برخلیک ټاکونکې وي.
په وروستيو څو کلونو کې د چین او امریکا ترمنځ ناندرۍ او د یو بل پر وړاندې خنډونه، په خاص ډول په اقتصادي برخه کې زياتې شوي دي.
ويل کيږي، چې افغانستان هم د دغو ناندريو له ډېرو قربانیانو څخه دی.