تاند(پنج شنبه، د ثور ۲۹ مه) د طالبانو د واکمنۍ وياند ذبيح الله مجاهد وايي، چې له هېواده د غنمو په بهر ته وړلو بنديز ولګول شو.
د نوموړي په وينا، د هېواد ټولو ګمرکاتو ته د ماليې وزارت لخوا لارښوونه شوې چې له هېواد څخه د غنمو بهرته انتقالول او ایستل په مطلق ډول بند کړي.
مجاهد زیاتوي:« دا کار په هېواد کې د غنمو له کمښت څخه د مخنیوي په منظور ترسره شوی دی.»
دا پریکړه په داسې مهال شوې، چې په وروستيو کې د غنمو د بهر ته لېږدولو په اړه راپورونه او نیوکې زیاتې شوې وې.
يو شمير خلکو د طالبانو یو شمېر چارواکي هم په دې کار کې په لاس لرلو تورن کړي وو.
د نړيوالو ادارو د معلوماتو له مخې، نړۍ د غنمو له کمښت سره مخامخ ده او له همدې کبله ډېرو هېوادونو د غنمو پېرلو او قاچاق ته مخه کړې ده.