تاند(دوشنبه، د ثور ۲۶ مه) د غزني د قره باغ ولسوالۍ په کروسای سیمه کې د فوټبال لوبغالی جوړ شو.
ځايي چارواکو ویلي، چې د دغه لوبغالي د ځمکې د ورکړې او مالي چارې د یادې ولسوالۍ ملي سوداګر حاجي عبدالصمد “میاخېل” په غاړه اخيستې وې.
د غزني لپاره د طالبانو والي مولوي محمد اسحاق “اخندزاده” د دغه لوبغالي د پرانېستې په مراسمو کې وویل: ( ولايتي اداره ژمنه ده چې د غزني د مرکز په ګډون په ټولو ولسوالیو کې لوبغاړو ته اسانتیاوې برابرې کړي. په خبره یې، اسلامي امارت د ورزش او ورزشکارانو څخه کلک ملاتړ کوي.)
هغه له لوبغاړو غوښتنه وکړه چې خپل ځانونه د شریعت په چوکاټ کې برابر کړي، د لمانځه او ديانتدارۍ ټینګه پابندي وکړي او د لوبو پر مهال په خپل وخت سره لمونځونه ادا کړي.
په همدې حال کې د المپیک ملي کمیټې د دفتر رئیس محمدالله “احساس” وویل چې د ځوانانو دغه لوبې نړیوالو ته د یوې کاملې سولې او پوره یووالي پيغام ورکوي.
احساس وويل چې د ورزش په ودې سره د ټولو بدمرغيو ور تړل کېږي.
هغه وويل، چې د ورزش لوى رياست او المپیک ملي کمېټې په لومړي پړاو کې په ټولو ولایتونو کې سیالۍ جوړې کړې، اوس په دوهم پړاو کې د هېواد ټولو ولسواليو ته سیالۍ غځوي، چې په غزني کې له قره باغ ولسوالۍ څخه پیل شوي دي .
احساس له ځوانانو غوښتنه وکړه چې خپل وطن ته په هره برخه کې کار وکړي او د اتفاق او یووالي پر رسۍ منګولې کلکې کړي.
د طالبانو ځايي چارواکو د دغه نوي جوړ شوي لوبغالي جزييات په اړونده اعلاميه کې نه دي په ډاګه کړي.