تاند(دوشنبه، د ثور ۲۶ مه) د افغانستان بانک لپاره د طالبانو چارواکي وايي چې د شهزاده سرای په ګډون د صرافیو او پولي خدمتونو ټول مارکېټونه بيرته پرانيستل شوي دي.
د دغه بانک ویاند محمد صابر مومند وايي د صرافیو او پولي خدمتونو هغه وړاندې کوونکي چې له افغانستان بانک څخه یې جواز اخیستی، په عادي ډول یې کړنې دوام لري.
د هغه وینا، هغه اشخاص چې صرافۍ او پولي خدمتونه یې تړلي دي؛ دا د دوی شخصي ستونزه ده.
هغه زياتوي، چې د افغانستان بانک په یاد سکټور کې روڼتیا او خوندیتوب ته ژمن دی چې د صرافیو او پولي خدمتونو ټولې کړنې د نافذه قوانینو او مقراراتو په اډانه کې تنظیم شي.
د طالبانو دغه وياند خبرداری ورکړ، چې د جواز نه لرونکي صرافان او د پولي خدمتونو له وړاندې کوونکو سره به قانوني چلند کېږي.
پرون د افغانستان د صرافانو ټولنې وويل، چې د پولي خدمتونو او صرافیو په اړه د طالبانو د وروستيو قيوداتو په غبرګون کې د هېواد په کچه ټولې صرافۍ تړل شوي دي.
وروسته ځينو صرافانو ادعا وکړه، چې طالبانو په زوره د افغانستان د صرافۍ تر ټولو لوی مرکز ( شهزاده سرای) پرانيستی او د دوی اعتراض ته یې پاملرنه نه ده کړې.
پر صرافانو وضع شوي شرایط دا دي، چې هر صراف باید د خپل فعالیت په بدل کې، پنځه ملیونه افغانۍ تضمین د افغانستان بانک ته ورکړي، دوه لکه افغانۍ د کاغذي جواز بیه تحویل کړي او پڼخوس ملیونه افغانۍ د خپل کار او بار لپاره پانګه وښيي.
يو شمير افغان صرافانو د دې قيوداتو په اړه اعتراض کړی او ویلي، چې عملي کول یې ستونزمن دي.
د افغانستان د صرافۍ مرکزونه تر ډېره د پيسو د لېږد رالېږد چارې سمبالوي، چې خلک یې اسانتياوې ستايي خو پکې د تورو پيسو په راکړه ورکړه هم انديښمن دي.
د افغانستان پرزول شوی جمهوري نظام څو ځله په دې کې پاتې راغی، چې پر صرافانو خپل ټول قيودات ومني.