تاند:( دوشنبه، د ثور شپږ ویشتمه) په تخار کې د واده په مراسمو کې خوړو څلوېښت تنه مسموم کړي دي.
ځايي چارواکو ويلي، چې پرون مازدیګر ۵ بجې د تخار د چاه آب ولسوالۍ په تخن اباد کلي کې د واده په مراسمو کې د ناپاکو خوړو د خوړلو له امله د زوم په ګډون ۴۰ تنه مسموم شوي دي.
د دوی په وینا، مسموم شوي کسان د درملنې په موخه د ولسوالۍ مرکزي روغتون ته لېږدول شوي او د ځینو روغتیايي حالت نازک ښودل شوی دی.
مسوولین وایي چې په پېښه کې د لاس لرلو په تور د پخلي کوونکي په ګډون درې تنه نیول شوي او پلټنې ترې پیل شوې دي.
ورته پیښې تر ډېره د کولتوري ستونزو زيږنده ګڼل کیږي.