تاند:( دوشنبه، د ثور شپږ ویشتمه) په میدان وردگو کې د طالبانو د استخباراتو ریاست منسوبینو د یاد ولایت په بهسودو ولسوالۍ کې د غیرمسؤله وسله وال قومندان عليپور زیات شمېر وسلې او مهمات ترلاسه کړي.
د طالبانو په يوه اعلاميه کې راغلي، چې په ترلاسه شویو وسلو او مهماتو کې دېرش کلاشینکوفونه، یو بم یک، یوه پیکا او لسګونه ګولۍ شاملې دي.
طالبانو د بيا واکمنیدو راهیسې یې څو ځله د علي پور د وسلو د څو زېرمو د نیولو خبر ورکړی.
علي پور د تېر جمهوري نظام په وروستيو کلونو کې د هزاره ګانو د حقونو د ملاتړ په پلمه مسلح او په مختلفو پښتنو ضدو وسله والو کړنو تورن شو.
هغه د جمهوري نظام په خلاف هم وجنګید او یو ځل یې د یوې پوځي چورلکې له نسکورولو سره څو افغان پیلوټان او نور سرتېري شهیدان کړل.
له علي پور څخه د تېر جمهوري نظام دویم مرستیال سرور دانش ملاتړ کاوه.
نوموړي څو ځلې د همداسې مشهودو جرمونو باوجود علي پور په ضمانت را خوشې کړی و.