تاند:( جمعه، د ثور در ويشتمه) د طالبانو د رییس الوزرا د لومړي مرستیال ملا عبدالغني برادر اخوند په مشرۍ یو ځانګړي کمېسیون د ډبرو له سکرو څخه د برېښنا د تولید لپاره ټاکل شوی.
د ملا برادر دفتر وايي، چې په غونډه کې د اوبو او انرژۍ وزارت په مشرۍ د کانونو او پترولیم وزارت او د صنعت او سوداګرۍ خونې مسؤلینو ته دنده سپارلې چې په یاده برخه کې څېړنې ترسره او د کمېسيونراتلونکې غونډې ته راپور وړاندې کړي.
سرچینه زیاتوي: د کانونو او پترولیم وزارت له ډبرو سکرو څخه د برېښنا د تولید لپاره لږ تر لږه د ۳۰ کلونو لپاره خام مواد ورکولی شي.
طالبانو په هېواد کې د پر ځان بسیاینې د پروګرامونو په اړه ډېر ټينګار کړی او په دې برخه کې یې د ځینو هڅو يادونه کړې ده.
يو شمېر خلکو د دوی دا دریځ او لومړنۍ کړنې ستايلي، خو ټينګار يې کړی چې په حکومتي چوکاټ کې د مسلکي کادرونو له ساتلو سره طالبان په دې برخه کې لاسته راوړنې لرلای شي.
پر طالبانو دا نيوکه ډېره کیږي، چې حکومتي جوړښتونه یې د غير مسلکي او طالبانو په ګومارلو سره پاشلي او ګډوډي یې رامنځته کړې، خو طالبان دغه تورونه نه تاییدوي.