تاند:( پنج شنبه، د ثور پینځلسمه) د امريکا متحده ايالاتو د پوځ لوی درستیز جنرال مارک میلي وايي، چې په افغانستان کې د بیرته انسجام لپاره د داعش ډلې هڅې ناکامه شوي دي.
نوموړي د خپل هېواد د مشرانو جرګې په یوه غونډه کې ویلي، چې دغې ډلې په افغانستان کې د بیرته منسجمیدو هڅې کړي، خو پکې پاتې راغلې ده.
د هغه په وينا، امريکا ته سمدستي د داعش ډلې له لوري کوم ګواښ نه دی متوجه.
د امریکا د پوځ لوی درستیز دا څرګندونې په داسې حال کې کړي، چې مخکې ګڼو امریکايي چارواکو له افغانستان څخه د داعش ډلې د بیرته فعالیدو او د امریکا په ګډون نړۍ ته یې د ګواښونو خبر ورکړی و.
د افغانستان طالب چارواکو بيا ټينګار درلود، چې داعش ډله یې ځپلې او پیاوړی کیدو ادعاوې یې ناسم رسنيز تبلیغات دي.
له دې سره، په تېره روژه کې افغانستان د ګڼو خونړیو پېښو شاهد و، چې د ډېرو مسووليت يې داعش ډلې پر غاړه اخيستی دی.