په اروپا کې یو افغان کډوال په دې خاطر چې د بيلجيم په مېنن ښار کې د پناه غوښتنې په یوه کمپ کې يوه ښځينه کارکونکې د غصې په حالت کې له ستوني ونيوله، چې دې عمل افغان کډوال ته بلاخره د محکمې له لوري د ۵ میاشتو بند او ۴۰۰ ایرو د جريمې سزا واورول شوه.
ويل کېږي، دا پېښه هغه وخت رامنځته شوې، چې یاد افغان کډوال د غرمې ډوډۍ لپاره يو خوړنځای ته ورځي، ګوري چې په خوړنځای کې ډوډۍ خلاصه شوې ده.
د خوړنځای ټولنیزې مرستیالې ورته ویلي، دا چې اوس د خوراک لپاره څه نلرو، تاسې مو پیسې واخلئ او له بهر څخه خواړه را ونیسئ.
دا چاره د افغان کډوال غوسه راپاروي او له لفظي شخړې وروسته په قهرېدلي حالت کې د کمپ ټولنیزه مرستیاله له ستوني نيسي، دا وخت د خوړنځای بله ټولنیزه مرستیاله راځي او له افغان کډوال میرمن ژغوري.
په اروپايي هېوادونو کې له ستوني څخه نيول په دې مانا، چې برید کوونکی غواړي، هغه ووژني.
د خوړنځي ټولنیزه مرستیاله له دې پېښې وروسته ډارېدلې او له خپلې دندې يې استعفا ورکړې. بيا تللې او په محکمه کې یې د قاضي پر وړاندې تېره ورځ ويلي، چې دې پېښې زما ټول خوب تښتولی.
محکمې له دې عارضې وروسته ياد افغان کډوال ته پورته سزا اورولې ده.