تاند(چهارشنبه، د ثور ۱۴ مه) د طالبانو یو منځلاري مشر انس حقاني وايي چې په راتلونکو څو ورځو کې به دیني عالمان غونډه وکړي او د نجونو د لېسو د پرانیستلو په اړه به پرېکړه وکړي.
انس حقاني، چې د اختر لپاره خوست ولایت ته تللی و، په یوه غونډه کې نن (چهارشنبه) وویل:«په لنډو ورځو کې به د دیني عالمانو غونډه جوړه شي او هغه ستونزې به پکې حل شي چې د نجونو د ښوونځیو په اړه شته.»
د انس حقاني په شمول ګڼ شمېر طالبان د نجونو د ښوونځیو د پرانیستلو پلویان دي خو یو شمېر دودیز او زوړپال ملایان، چې ویل کېږي د طالبانو د لوی مشر په شاوخوا کې راټول دي، د نجونو له ښوونځیو او کار سره کلک مخالفت کوي.
انس حقاني، چې په خوست کې يې د ځوانانو او مدني فعالانو یوې غونډې ته خبرې کولې، وویل، د نجونو زده کړه د افغانانو ګډه غوښتنه ده او په نژدې راتلونکې کې به په ټول افغانستان کې له اووم ټولګي څخه د پورته نجونو په مخ د ښوونځیو دروازې پرانیستل شي.
ده وویل:«هېڅوک باید دا فکر ونه کړي چې یو مشروع کار د اسلامي نظام له لوري بندیږي او یا به ښځې او نجونې چې د خپلو هېوادوالو د خدمت لپاره تعلیم کوي، هغوی به تعلیم ته نه پرېښودل کیږي.»
د طالبانو له لوري د نجونو د ښوونځیو نه پرانیستل سبب شوي چې د دوی په اړه د افغانانو او نړیوالو نظر، چې څه نا څه نرم شوی و، بېرته منفي شي.
د طالبانو په منځ کې سختدریځي هر څه موده وروسته یوه داسې پرېکړه کوي چې د دې ډلې د حکومت په اړه د منفي نظرونو له پیاوړتیا سره مرسته کوي.
طالبانو د تېر کال په اګست کې د نجونو د ښوونځوی له بندولو وروسته ژمنه کړې وه چې په نوي لمریز کال کې به د نجونو ټول ښوونځي پرانیزي خو د سختدریځو ملایانو د ټینګار له کبله یې پر خپله ژمنه عمل ونه کړای شو.