تاند:( يکشنبه، د ثور يوولسمه) د طالبانو د لوی مشر ملا هیبت الله اخوند زاده په رول کې یوه کس نن په کندهار کې د اختر د لمانځه پر مهال خلکو ته شا ارولې او وينا يې ورته کړې ده.
دغه کس په خپله وینا کې خلکو ته د اختر مبارکۍ ترڅنګ د طالبانو په لاس « د هېواد د آزادۍ او بشپړ امنيت» مبارکي ويلې ده.
طالبانو د دغه ويناوال ټوله وینا نه ده خپره کړې او نه یې خبریالان نیږدې ور پریښي دي.
د تیرې چارشنبې په ورځ ( د ثور په اوومه) له طالبانو څخه څو باخبره سرچينو تاند ته وويل، چې طالبان به د کوچني اختر د لمانځه پر مهال په کندهار کې د خپل لوی مشر ملا هیبت الله اخوند زاده په نوم ( چې دوی یې امیرالمؤمنین ګڼي) یو بل کس خلکو ته وښيي.
سرچینو په هماغه ورځ تاند ته ويلي وو، چې طالبان به ملا هیبت الله اخوند زاده ته د منسوبو عکسونو یو برعکس کس د هغه په نوم رسنيو ته وښيي.
د تاند سرچينو هماغه ورځ ويلي وو، چې په دې اړه به د طالبانو استدلال دا وي، چې د هيبت الله اخوند زاده اصلي څېره يې د امنیتي ګواښونو له امله پټه ساتلې وه.
دا په داسې حال کې ده، چې د ملا هیبت الله د مرګ او ژوند په اړه له پخوا راهیسې مختلفې څرګندونې کیږي.
د طالبانو یو شمېر منتقدان او استخباراتي سرچینې ادعا کوي، چې نوموړی څو کاله مخکې مړ شوی يا وژل شوی، خو د طالبانو سرچینې دا ادعاوې بې بنسټه ګڼي.
د طالبانو څو سرچينو هم د ثور په اوومه تاند ته تاييد کړې وه، چې په کوچني اختر کې به د دوی لوی مشر په عام محضر کې څرګند او مهم پيغامونه وړاندې کړي، خو د نورو جزییاتو په اړه یې څه نه و ویلي.
.یو شمېر افغان شنونکو د ملا هیبت الله نه څرګنديدل د نوموړي د مړینې په اړه د شکونو د زياتيدو سبب بولي.
طالبانو په دې اړه غبرګونونو ته ځواب نه دی ورکړی.
د تاند مخکينی خبر په دې لینک کتلای شئ:
سرچينې: ط په کندهار کې د اختر لمانځه پر وخت د ملا هیبت الله په نوم کس خلکو ته ښیي