تاند:( يکشنبه، د ثور يوولسمه) په داسې حال کې، چې د طالبانو له لوري د یکشنبې په ورځ د اختر له اعلانیدو د کابل په ګډون مختلفو ولايتونو کې په هوايي ډزو د هرکلي شکایتونه شوي، طالبانو د پټاقیو او پلاستيکي وسلو پېر او پلور منع اعلان کړ.
د طالبانو کورنیو چارو وزارت په يوه اعلاميه کې ويلي، چې د پټاقیو او پلاستیکي وسلې پر پېر او پلور منع دی.
سرچینه زیاتوي:« دغه ګام د ذهني سکون او د رواني امنیت د تامین په موخه اخېستل شوی دی.»
دغه وزارت خبرداری ورکوي، چې د دې پریکړې له سرغړونکو سره به قانوني چلند کېږي.
ځينو خلکو بيا ادعا کړې، چې د اختر د نېټې د اعلان په خوښۍ شوې ډزې د طالبانو د جنګياليو له لوري شوي دي.
د طالبانو چارواکو بيا يو شمېر خلک په دې کار تورن کړي، خو کابل مېشتو یې په غبرګون کې ويلي چې د خلکو له کورونو وسلې د کور په کور پلټنو پر وخت طالبانو وړي او په دې برخه کې د خلکو تورنول بې بنسټه کار دی.
يو شمېر نورو خلکو بیا د پټاقیو او پلاستيکي وسلو د مخنیوي په برخه کې د طالبانو پریکړه ستايلې او ويلي، چې دا پريکړه بايد لا مخکې شوې وای او هېواد ته د دې توکيو د واردولو اجازه نه وه ورکړل شوې.