تاند:( شنبه، د ثور لسمه) د طالبانو د بهرنيو چارو او اطلاعاتو او کلتور وزيرانو مولوي امير خان متقي او ملا خیرالله خیرخواه د قطر هيواد د کورنۍ او ټولنيزو چارو پرمختګ وزيرې مريم المسند او مل هيئت سره لیدلي.
د طالبانو د بهرنيو چارو وزارت د اعلامیې له مخې، په کتنه کې المسند وويل چې د دې د وزارت د کار ساحه د يتيمانو، ښځو او معلولينو لپاره د کورني ژوند، کار، اقتصاد او تعليم برخو کې خدمات وړاندې کول او د خيريه بنسټونو د چارو تنظيمول دي.
د نوموړې په وينا چمتو دي چې د افغانستان بيوزلو سره بشردوستانه مرستې وکړي.
د طالبانو د بهرنيو چارو وزير د دوی د کار ساحه او مسووليت ډير دروند وباله او بلنه يې ورکړه چې افغانستان ته راشي، د ميرمنو، يتيمانو او معلولينو حالات له نيژدې وویني او په دې برخه کې د قطر خيريه بنسټونو له لارې ماشومانو، ميرمنو او نورو اړینو برخو کې خدمات وړاندې کړي.
د طالبانو د اعلامیې په اساس، په پای کې پریکړه وشوه چې افغانستان ته د قطر هيواد هيئت راشي ترڅو وکولاي شي أفغانستان کې د خپل خيريه بنسټونو دفاتر خلاصولو او له بيوزلو سره د مرستو پيلولو ته لاره اواره شي.
د ملګرو ملتونو د ارقامو له مخې، په افغانستان کې نيږدې ۲۸ ميليونه خلک د طالبانو له واکمنیدو سره سخت فقر ځپلي او عاجلو مرستو ته اړتيا لري.
طالبانو مخکې په دې اړه راپورونه له مبالغو ډک ګڼل، خو خپله یې تر اوسه د فقر فیصدي نه ده په ډاګه کړې.