تاند:( شنبه، د ثور لسمه) ازبکستان حکومت وايي، چې د جمهوري نظام له سقوط څخه وروسته له افغانستان څخه دغه هېواد ته وړل شوې لسګونه الوتکې او چورلکې طالبانو ته نه ورکوي.
د افغانستان په چارو کې د ازبکستان د ولسمشر ځانګړي استازي عصمتالله ایرگاشف په دې اړه ویلي، چې ياد شوي پوځي تجهيزات د امریکا اړوند دي او دوی د هغه هېواد په خوښه خپل ملکيت ګرځولي دي.
د افغانستان د بې واکه شوي ولسمشر محمد اشرف غني لومړي مرستيال امر الله صالح له ازبکستان څخه د دې پریکړې له کبله مننه کړې او ويلي، چې که دا تجهيزات طالبانو ته ورکړل شي، د افغانانو په خلاف به يې وکاروي.
د جمهوري نظام له سقوط سره د افغانستان ګڼو پيلوټانو لسګونه الوتکې او چورلکې ازبکستان ته وليږدولې.
دغه الوتکې او چورلکې تر ډېره د امریکا متحده ایالاتو له لوري د افغانستان پرزول شوي جمهوري نظام سره مرسته شوې وې.
طالبانو پر کابل له واکمنیدو وروسته، څو ځلې له ازبکستان څخه د يادو الوتکو او چورلکو د ور سپارلو غوښتنه وکړه، خو ازبکستان رد کړه.
د طالبانو د دفاع وزیر ملا یعقوب مجاهد يو ځل ازبکستان ته له دې کبله خبرداری هم ورکړ او ويې ويل، چې ازبکستاني چارواکي نه بايد د طالبانو حوصله وازمايي.