تاند:( پنجشنبه ، د ثور اتمه) د « چاينا ټاون» په نوم د چین يوه سوداګريزه ډله، چې له مخکې کلونو څخه يې په افغانستان کې د يوه صنعتي ښارګوټي د جوړولو غوښتنه لرله، په دې اړه يې طالب چارواکو سره مذاکرات پيل کړي.
د دغې ډلې مشر «لی شی جینگ ويلي، چې نن به په دې اړه رسما له طالب چارواکو سره خبرې اترې وکړي.
د چينايي شرکتونو دا ډله د معادن او ساختماني وسايطو د تولید په برخه کې غواړي پانګونه وکړي.
دغې ډلې ۳ کاله مخکې د افغانستان پرزول شوي جمهوري نظام ته هم په دې اړه خپله طرحه وړاندې کړې وه.
د طالبانو چارواکو په مشخص ډول په دې اړه څه نه دي ويلي او نه ده معلومه، چې چينايي پانګوال به له کومو دغو چارواکو سره وويني.
د طالبانو د واکمنۍ اقتصادي چارې د دوی د رييس الوزرا اقتصادي مرستیال ملا عبدالغني برادر رهبري کوي او ويل کېږي، چې حقاني شبکه او نور مخالفان يې د نوموړي ډله د اقتصادي سکتور په انحصار تورنوي.
طالب چارواکو مخکې د مختلفو هيوادونو له پانګوالو سره ليدلي او په عمومي ډول يې ټول په افغانستان کې پانګونې ته دعوت او د امنيتي اسانتياوو ډاډ ورکړی.
راپورونه وايي، چې دمګړۍ ۵ چينايي شرکتونه په افغانستان کې فعال دي او تر ۲۰ نورو دلته پانګونې ته لېوالتیا ښودلې ده.