تاند:( سې شنبه، د ثور شپږمه) د افغانستان او ایران په ګډه پوله کې د طالبانو او ايراني ځواکونو له ناندریو سره هم مهاله، د طالبانو د کډوالو چارو وزیر خليل الرحمن حقاني په مشرۍ د دوی یو پلاوی له ایراني لوري سره د خبرو په موخه تهران ته سفر کوي.
خبري سرچینې وايي، چې دا سفر به له کوچني اختر څخه مخکې ترسره او د سرحدي ناندريو تر څنګ پکې په ایران کې د مېشتو افغان کډوالو د ستونزو او دغه راز د دواړو هېوادونو تر منځ د بندیانو د تبادلې په اړه خبرې وشي.
د طالبانو د واکمنۍ یوه ویاند بلال کريمي ويلي، چې په دې سفر کې د طالبانو يو شمېر قضايي چارواکي هم شامل دي.
په ورته وخت کې د ایران د بهرنیو چارو وزارت ویلي، چې د سرحدي ځواکونو د روزلو په برخه کې له طالبانو سره همکارۍ ته چمتو دي.
طالبانو د ایراني چارواکو دغې غوښتنې ته ځواب نه دی ورکړی.
پرون د ایران د بهرنیو چارو وزارت وياند سعيد خطیب زاده په افغانستان کې د پښتنو « اکثريت» والی هم رد او وويل , چې د افغانستان ټول میشت قومونه اقلیت دي او دغه هېواد کوم اکثريت نه لري .
طالبانو په هغې اړه هم کوم غبرګون نه دی څرګند کړی.