تاند:( سې شنبه، د ثور شپږمه) د طالبانو د کابینې اقتصادي کمیسیون د ملا برادر په مشرۍ غونډه کې تایید کړه، چې د کابل په پیروزي صنعتي پارکونو کې یو نیم سل نوې فابریکې جوړې شي.
ويل شوي، چې د دغو فبریکو د جوړولو طرحه بیجنگ – ننگرهار ګروپ وړاندې کړې او د ۲۱۵ میلیونه ډالرو پانګونه به په دې برخه کې وکړي.
د طالبانو په يوه اعلاميه کې راغلي، چې د دغو فابریکو په جوړیدو سره به شاوخوا ۱۳۵۰۰ تنو ته په مستقيمه او شاوخوا ۳۰ زرو تنو ته په نا مستقيمه توګه د کار زمينه برابره شي.
د کابل د پیروزي صنعتي ښارګوټي پروژه ۱۳ کاله مخکې د کابل ولايت په ده سبز ولسوالۍ کې پیل شوې ده.
د دې او نورو صنعتي پروژو چارې مخکې تر ډېره ناکامې وې، چې د امنيت د نشتوالي تر څنګ په حکومتي ادارو کې پراخ فساد او د کارونو ځنډ یې اصلي لاملونه بلل کیدل.
اوس نیوکې دا دي، چې د طالبانو له واکمنیدو سره د امنیت ښه کيدو باوجود خلک پر اوسني او راتلونکي وضعیت بې باوره او له هېواده په تېښته دي، چې له دې کبله اقتصاد او پانګونه ډېره زيانمنه شوې ده.