تاند:( دوشنبه، د ثور پينځمه) د ننګرهار عامې روغتيا رياست اړوند د پښتورګو ملي روغتون کې د مطيع الله په نوم يو ناروغ له چپ پښتورګي څخه شاوخوا پنځوس لويې اووړې تيږې د عمليات په ترڅ کې وايستل شوې.
د دغه ولايت روغتيايي چارواکي وايي، چې د ناروغ ښي پښتورګی پخوا عملیات شوی و او د چپ د تېږو د کراټينين مقدار هم ډېر لوړ و چې په کاميابۍ سره ترې وايستل شوې.
د نوموړي د ناروغۍ او عملياتو د څرنګوالي په اړه ډېر جزییات نه دي ورکړل شوي.
په وروستيو کلونو کې د ننګرهار ډاکټرانو د ورته مختلفو نورو حیرانونکو عملياتو خبر ورکړی و.
دا په داسې حال کې ده، چې ګڼ افغان ناروغان لا هم ګاونډيو هېوادونو ته د درملنې لپاره ورځي.
په کور دننه د روغتيايي ستونزو د نه حلیدو یو اصلي دلیل دا ګڼل کېږي، چې حکومتونو پر روغتيايي سکتور اساسي کار نه دی کړی او د وسایلو او تجهيزاتو کمښت او نه معياري توب پر افغان ډاکټرانو او خدماتو یې د کمرنګه باور سبب شوي دي.