تاند:( دوشنبه، د حمل ۳۰ مه) د داعش ډلې خراسان پر ازبکستان د افغانستان له خاورې څخه د توغندیو د برید مسوولیت اخیستی.
دغې ډلې ويلي، چې ياد شوي بریدونه یې له ۱۰۷ ميلي توغندیو څخه په استفادې د ازبکستان د ځواکونو پر ضد کړي دي.
معلومه نه ده، چې دغه ادعا شوي بریدونه ځاني زيانونه هم لري او کنه؟
تر اوسه د دې بریدونو په اړه د ازبکستان چارواکو او د افغانستان طالب چارواکو څه نه دي ويلي.
مخکې د نړۍ د ډېرو نورو هېوادونو په شان د ازبکستان او منځنۍ اسيا د ډېرو هېوادونو چارواکو د افغانستان له خاورې دوی ته د ګواښونو انديښنه ښودلې وه.
طالب چارواکو بيا په دې اړه اندیښنې رد کړې او د افغانستان له خاورې چا ته د زيان نه اوښتو ډاډ ورکړی و.