تاند:( یکشنبه، د حمل ۲۸ مه) د پاکستان تر حاکمیت لاندې سیمو کې د پښتون ژغورنې غورځنګ رهبر منظور پښتین پر افغانستان د پاکستان د هوايي ځواک د وروستيو بمباريو په اړه توند غبرګون ښودلی.
ښاغلي پښتین په یوه ټویټ کې لیکلي:« په جنګ کې د ښځو، ماشومانو او بېګنا خلقو وژل جنګی جرم دې.په افغانستان کې د پاکستان له خوا شوی بمبارونو کې د ښځې او ماشومانو د شهید کولو خبرونه افسوسناک دی
د دې ټول جنګ وجه د پاکستان سټریټیجیک ډیپت پالیسې دی.»
د پښتون ژغورنې غورځنګ رهبر زیاتوي:« د لسیزو راهسې روان جنګ ته له دې پای ټکی نشته.نور دې د پښتنو په خاوره جنګ بند شي.»
د پاکستان هوايي ځواک اوړمه شپه پر خوست، کونړ او پکتیکا ولایتونو بمبارۍ وکړې او په دې بريدونو کې د پاکستان د طالبانو تحريک د شاوخوا ۳۰ غړو د وژلو ادعا وکړه.
افغان سرچينو د وزيرستاني کډوالو په لوی ګډون په دې پېښو کې د شاوخوا ۴۰ تنو د وژل کيدو خبر ورکړ.
د کونړ ځینو خلکو ويلي، چې په وژل شويو کسانو کې د څو ماشومانو په ګډون د يوې کورنۍ څو غړي شامل دي.
پاکستاني چارواکو له دې پېښې وروسته په اسلام اباد کې د طالبانو د سفارت سرپرست هم احضار کړی او ادعا یې کړې، چې ګواکې د پاکستان پر پوځيانو په جنوبي وزیرستان کې وروستي بریدونه د پاکستان تحریک طالبان له افغانستان څخه تر سره کړي.
د طالبانو د بهرنيو چارو وزير مولوي امیر خان متقي بیا په کابل کې د پاکستان سفير منصور احمد خان د ياد شوي بمبارۍ له کبله ور غوښتی او د طالبانو د حکومت اعتراض یې ورسره شريک کړی دی.
ياد شوي بریدونه او په اړه یې د طالب چارواکو داسې څرګندونې په پراخه کچه د افغانانو توندو غبرګونونو سره مخامخ شوي دي.