تاند:( شنبه، د حمل ۲۷ مه) له نيمروز ولايت څخه راپورونه وايي، چې پرون پاکستاني ځواکونو ډیورنډ فرضي کرښې ته نيږدې یو شمېر افغانان وژلي.
عیني شاهدانو ویلي، چې دا پېښه پرون جمعه د نوکندي ولسوالۍ په چاغي سیمه کې شوې ده.
ويل شوي، چې د پاکستان ځواکونو په دې سیمه کې د افغانانو تر ۳۰۰ پورې موټر ودرولي او د ښيښو له ماتولو وروسته یې د تېلو ټانکۍ له خاورو ډکې کړي دي.
راپور زیاتوي، چې وروسته پاکستاني ځواکونو افغان موټر چلوونکي په ګرمه هوا کې خوشې کړي، چې ۳ تنه یې مړه شوي او ځينې نور يې ټپيان دي.
له پېښې وروسته، د پاکستاني ځواکونو د دې عمل خلاف لاريون شوی، چې د هغوی په ډزو یو لاریون کوونکی وژل شوی او بل ټپي دی.
د طالبانو ځايي چارواکو په دې اړه څه نه دي ويلي.
څه موده مخکې په نیمروز کې د طالبانو او پاکستاني ځواکونو د نښتې او د طالبانو له لوري د پاکستان د یوې چورلکې د غورځولو او پکې د یوه ناست جنرال د ټپي کیدو آوازه وه، خو رسمی سرچینو په هغې اړه څه نه و ویلي.