تاند:( سې شنبه، د حمل ۱۶ مه) د بېلابېلو پېښو پر مهال د افغانستان په مختلفو سيمو کې د ۳ تنو د مړينې او ۲۱ نورو د ټپي کیدو خبر ورکړل شوی.
له نورستان ولايت څخه په يوه راپور کې راغلي، چې د نورګرام ولسوالۍ په مليل سيمه کې نن د يوې ترافيکي پېښې له امله ۳ تنه مړه شوي او ۱۴ نور ټپيان دي.
سرچينې وايي، چې د پیښې قربانیان او ټپيان په يوه پيک اپ موټر کې د يوې موسسې د مرستو ویشلو پروګرام ته تلل، چې ترافيکي پېښه يې وکړه.
د فارياب په مرکز ميمنه کې بيا يو غل يوه کور ته د غلا په نيت تللی او د ۲ طالب امنيتي ځواکونو په ګډون يې ۵ تنه ټپيان کړي دي.
ويل شوي، چې د طالبانو امنيتي ځواکونه د غله د نيولو لپاره تللي وو، چې دوی هم ټپيان شوي
ځایي سرچينو ويلي، چې په پېښه کې د يوه ټپي شوي کس وضعيت د اندیښنې وړ دی.
بل لور ته: يونيسف ادارې په لغمان کې د پخوانيو نا چاودو توکيو د چاودنې له امله د ۲ ماشومانو د ټپي کیدو خبر ورکړی.
له داسې پېښو او شدید اقتصادي ناورين سره بيا هم يوه لويه برخه افغانان د طالبانو راتګ او له جګړې لاس په سر کیدو ته خوشاله ښکاري او وايي، چې له جګړو او بریدونو څخه په لاس په سر کیدو سره یې د افغانستان ورځیني تلفات په مراتبو تر پخوا کم شوي.