تاند:(سې شنبه، د حمل دويمه) په ننګرهار کې د طالبانو چارواکي وايي چې د دې ولايت تورخم ښارګوټي کې له فرضي کرښې ها خوا دوه افغان ماشومان هغه مهال شهيدان او يو ټپي شو چې د مڼو لېږدولو پر مهال د بار ټيلر ټيرونو لاندې راغلل.
په تورخم کې د طالبانو کمېسار مولوي غازي الله پر يادې پېښې خواشيني ښودلې او ويلي، چې په دې ښارګوټي کې سلګونه ماشومان په سختو کارونو بوخت دي.
د طالبانو په اعلامیه کې په دې اړه نور جزییات نه دي ورکړل شوي.
معلومه نه ده، چې د پېښې عاملین نيول شوي کنه؟
په افغانستان کې د ماشومانو شاقه کارونه له پخوا څخه یوه جدي ستونزه ده، خو د طالبانو له واکمنیدو او د فقر او اقتصادي ناورين له شدت سره بېساری زیادښت پکې راغلی.
پرون د جلال اباد ښار په رینګ روډ سړک د یوې ټرافيکي پېښې له امله د څو ښځو په ګډون ۸ تنه وژل شوي وو.