تاند:(شنبه، د حوت ۲۸ مه) په پکتیا کې د ازادۍ کپ په نوم د څانګې غورځولو یا نیزې وهلو سیالیو لومړی پړاو پیل شو.
د پکتيا ځايي چارواکو ويلي چې په دې سیالیو کې د لوګر، خوست، غزني، پکتيا، پکتيکا، زابل او ميدان وردګ ولايتونو ورزشکارانو ګډون کړی دی.
د سیالیو تنظيمونکي وايي، د دې سياليو څخه موخه د ولايتونو د ورزشکارانو ترمنځ د پيوستون او له يو بل سره د دودونو تبادله ده.
بل لور ته: د دې لوبې په څنډه کې د طالبانو د بدني روزنې او ورزش د عمومي رييس انجنير نظرمحمد مطمئن له خوا د دې لوبو ميدان پرانيستل شو.
د یادولو وړ ده چې دا سیالۍ د ۲۸۰ لوبغاړو په ګډون پیل شوي، چې څلور ورځې به دوام وکړي.