تاند:(شنبه، د حوت ۲۸ مه) د افغانستان لپاره د روسیې د ولسمشر ځانګړي استازي ضمير کابلوف په افغانستان کې د ملګرو ملتونو د سرمنشي د ځانګړي استازي د دفتر «يوناما» د ماموريت د يو کلن تمديد په اړه توند غبرګون ښودلی.
کابلوف ويلي چې د دغه ماموريت د تمديد او څرنګوالي په اړه په افغانستان کې له واکمنو طالب چارواکو سره خبرې نه دي شوي.
کابلوف دا هم ويلي چې د يوناما د ماموريت د تمديد په اړه په خپور شوي پريکړه ليک کې د طالبانو د واکمنۍ کومه يادونه نه ده شوې.
د روسیې د ولسمشر استازي دا هم ويلي چې لویدیځو هېوادونو سره له دې چې د پريکړه ليک د تصویب ملاتړ کړی خو د طالبانو د حکومت د نه رسميت پېژندلو یادونه یې کړې او دا په دې مانا ده چې لويدیځ هېوادونه نه غواړي د طالبانو حکومت په رسمیت وپیژني.
ضمير کابلوف زياتوي، د يوناما د ماموريت په اړه له طالبانو سره د سلا مشورې نشتوالی ممکن دغه ماموريت بې اغېزې کړي.
د طالبانو د اسلامي امارت وياند ذبيح الله مجاهد په افغانستان کې د يوناما د ماموريت د يو کلن تمديد هرکلی کړی او له نړۍ سره یې د اړیکو په زیاتیدو هیله مندي ښودلې ده.
له روسیې څخه مخکې پاکستان هم په افغانستان کې د يوناما د ماموريت په اړه ورته پارونکې خبرې کړې وې.
يوناما په دې اړه غبرګون نه دی ښودلی.
ويل شوي چې روسیې په ملګرو ملتونو کې د يوناما د ماموريت د تمديد په اړه سپینه رایه کارولې وه.