تاند:(پنجشنبه، د حوت ۲۶ مه) د ترکمنستان حکومت، چې له طالبانو سره نژدې اړيکې لري، نن يې په عشق اباد کې د افغانستان سفارت رسما طالبانو ته وسپاره.
په دې مراسمو کې د طالبانو له لوري د سفارت سرپرست حاجي فضل محمد صابر هم دندې ته معرفي او خپله کار يې پيل کړ.
د یادو مراسمو پر مهال د ترکمنستان د بهرنيو چارو وزارت مرستيال وفا حاجیوف ويلي چې دوی له طالبانو سره په ګډه کار کولو ته چمتو دي.
د طالبانو حکومت، چې د رامنځته کيدو يې شاوخوا ۸ مياشتې کيږي، تر اوسه د نړۍ د يوه هېواد له لوري هم په رسميت نه دی پېژندل شوی.
تر دې مخکې په پاکستان، چین، ترکیه او یو شمېر نورو هېوادونو کې هم په ښکاره او پټه د افغانستان سفارتونه طالبانو ته سپارل شوي دي.
په ترکمنستان کې د افغانستان سفير څه موده مخکې له خپلې دندې استعفا کړې وه.
طالبان په وروستيو کې د رسميت پېژندلو او لږ تر لږه ورسره د نړۍ د ديپلوماتيک تعامل د رامنځته کيدو په اړه هیله من شوي دي.
په ښکاره هیڅ هېواد هم د طالبانو په رسميت پېژندلو ته چمتووالی نه دی ښودلی، خو ویلي چې که طالبان ملي روغې جوړې، او په حکومت کې د ښځو ګډون ته غاړه کښېږدي او د ټولو افغانانو بشري او نورو حقونو ته درناوی وکړي، حکومت به یې په رسمیت وپېژني.