تاند:(چار شنبه، د حوت ۲۵ مه) د کندهار په شاه ولي کوټ ولسوالي کې د ۵۰ میلیون افغانیو په لګښت د اوبو د یوه بند د جوړولو چارې پيل شوې.
د طالبانو د کرنې، اوبولګولو او مالدارۍ وزارت ويلي چې دغه بند د دغه وزارت په بودجه جوړېږي.
د اړوندو چارواکو د معلوماتو له مخې، دا بند به په پنځو میاشتو بشپړ شي او د ۴۰ زره جریبه ځمکې د خړوب وړتیا به ولري.
څو ورځې مخکې د کندهار په سپین بولدک ولسوالۍ کې هم د ۴۰ ميليون افغانيو په لګښت د اوبو د يوه بند د جوړولو د پیل خبر ورکړل شوی و.
د قندهار په شاه ولي کوټ کې د ۵۰ میلیونو افغانیو په لګښت بند جوړېږي.
د کرنې، اوبولګولو او مالدارۍ وزارت له بودجې د ۵۰ مېلیونو افغانیو په لګښت د اوبو بند د جوړېدو چارې پیل شوې. دغه بند د پنځو میاشتو په موده کې جوړېږي چې د ۴۰ زره جریبه ځمکې د خړوب وړتیا به ولري. pic.twitter.com/JfF3k26Xnq— Bakhtar News Agency (@BakhtarNA) March 16, 2022
د طالبانو د کرنې، اوبو لګولو او مالدارۍ وزارت او دغه راز د انرژۍ وزارت د اوبو مدیریت له خپلو مهمو کاري لومړیتونو څخه ګڼلي دي.
دا په داسې حال کې ده، چې د طالبانو له واکمنیدو سره په لومړیو ورځو کې طالبانو د اوبو د تنظيم د ملي ادارې مشر انجنير تکل له دندې رخصت او پر ځای یې یو ملا وټاکه.
د طالبانو پر دې پریکړې خلکو له دې کبله توند غبرګونونه وښودل، چې انجینر تکل یو غیر سیاسي او د اوبو د تنظيم مشهور متخصص و.