تاند (پنجشنبه، د حوت ۱۹ مه) د افغانستان لپاره د امریکا د متحدو ایالتونو ځانګړی استازی ټام ویسټ نن (پنجشنبه) په انتالیا کې د دیپلوماسۍ په فورم کې د ګډون لپاره ترکیې ته لاړ.
ټام ویست وروسته له دې ترکیې ته روان شو چې د بهرنیو چارو وزارت د سرپرست امیرخان متقي په مشرۍ د طالبانو د حکومت یو پلاوی له وړاندې انتالیا ته رسېدلی دی.
ټام ویسټ پر خپله ټویټرپاڼه کښلي چې په انتالیا کې به د امریکا له مهمو شریکانو سره له افغانستان سره د نړیوال تعامل په اړه وږغېږي.
متقي د ترکیې د باندنیو چارو وزیر چاوش اوغلو په بلنه پرون ترکیې ته په درې ورځیني سفر ورسېد.
ترکیه د افغانستان انکشافات په ځانګړې لېوالتیا تعقیبوي او په عین حال کې د طالبانو ډېری سیاسي مخالفان په دغه هیواد کې اوسي.
له همدې کبله ګومان کېږي چې ترکیه به هڅه کوي چې طالبان له خپلو مخالفانو سره خبرو ته هڅوي.