تاند:(چارشنبه، د حوت ۱۸ مه) د طالبانو د حکومت د پاسپورټ ریاست ویلي چې له نن څخه يې تر راتلونکو څلورو ورځو د پاسپورټونو د وېش چارې درولي دي.
د دغه ریاست په یوه اعلامیه کې راغلي، چې د دې پریکړې دليل د مراجعينو ډېروالی او د خدماتو په برخه کې ستونزې دي.
سرچينې ويلي چې د موقت ځنډ په ترڅ کې به د پاسپورټونو د وېش په کچه کې زياتوالی هم راوستل شي او د اړوندو ادارو ظرفيتونه به لوړ شي.
دا پریکړه په داسې مهال شوې، چې وړمه ورځ د طالبانو چارواکو د پاسپورټ ریاست لپاره نوی رييس معرفي کړ.
ويل کيږي چې د دغه ریاست لپاره د طالبانو مخکیني ټاکل شوي رييس پراخ فساد کړی او له پاکستان سره یې د يو ميليون بې کیفیته پاسپورټونو د چاپ له درغلۍ ډک تړون کړی دی.
د افغانستان د پاسپورټونو د چاپ اصلي تړون د جرمني له یوه شرکت سره شوی و، خو د طالبانو له واکمنیدو سره ویل شوي چې ياد شرکت همکارۍ ته دوام نه دی ورکړی.
طالبانو د دغو ادعاوو په اړه څه نه دي ويلي.
د پاسپورټ د وېش له چارو څخه پراخ شکایتونه موجود دي او ويل کيږي چې د فساد لویه مرجع ګرځيدلې ده.