تاند:(جمعه، د حوت ۱۳ مه) په کابل کې د طالبانو د امنیې قوماندانۍ ویاند خالد ځدراڼ وايي، چې نن سهار یې د کابل ښار د دويمې امنیتي حـوزې اړوند سيمه کې د چاڼيزو عملیاتو پر مهال په یو کور کې ۷ هاموې ټانکونه نیولي دي.
خالد ځدراڼ زياتوي، چې د کور په کور عملياتو لړۍ په کابل ښار کې لاهم په دقت سره دوام لري.
سرچينې په دې اړه نور معلومات نه دي ورکړي.
په کابل او یو شمېر نورو ولايتونو کې د طالبانو د کور په کور عملياتو لړۍ تېره اونۍ پيل شول، چې ځينو خلکو يې هرکلی او ځينو يې مخالفت کړی دی.
د دغو عملياتو مخالفين تورن شوي، چې د امنیتي وضعیت د ښه کیدو او دولتي پوځي تجهيزاتو د را ټولولو د هڅو تخریب کوي.
له دې سره، په ځينو سيمو کې د پلټنو پر مهال د طالبانو د ناسم چلند شکايتونه هم رسنيز شوي دي.