تاند:(پنجشنبه، د حوت ۱۲مه) خبري سرچينو کابل ته د روسیې د مختلفو وزارتونو د یوه کمیسون د سفر خبر ورکړی.
د سرچينو د معلوماتو له مخې، د دغه سفر مشري د روسیې د فدرالي هوايي ترانسپورت د ادارې مرستيال باخوریف ګیورګی کوي.
په پام کې ده، چې یاد شوی پلاوی به د طالبانو د حکومت له چارواکو سره له کتنې وروسته د کابل د هوایي ډګر وضعیت هم له نيږدې وګوري.
طالب چارواکو د دغه سفر په اړه ډېر جزییات نه دي ورکړي.
روسي پلاوی په داسې مهال کابل ته په سفر راځي، چې په ملګرو ملتونو کې د روسیې استازي تېره شپه د افغانستان په اړه د ملګرو ملتونو د امنیت شورا په ځانګړې غونډه کې افغانستان د ترهګرۍ مرکز وباله او په دې وضعیت رامنځته کيدو کې يې امريکا ملامته وګڼله.
طالبانو د روسیې د استازي تازه څرګندونو ته غبرګون نه دی ښودلی.