تاند:(چارشنبه، د کب يوولسمه) د طالبانو د کورنيو چارو وزارت وايي چې په کابل کې یې یو بهرنی داعشي جنګیالی نیولی.
دغه وزارت په يوه خپره کړې ویډیو کې ویلي چې ياد شوی داعش جنګیالی د کابل ښار په پینځلسمه ناحیه کې نیول شوی.
نوموړي کس په خپلو څرګندونو کې ويلي، چې اصلا د تاجيکستان اوسیدونکی دی، خو له طالبانو سره د جګړې لپاره د روسیې، ترکيې او ايران له لارې افغانستان ته راغلی و.
ياد شوي کس خپل اصلي نوم امېد او بدل نوم احمد فريد ښودلی.
طالبانو ويلي چې دغه داعش جنګیالي د دوی خلاف تخريبي فعاليتونو کې لاس درلود، خو په دې اړوند یې نور معلومات نه دي ورکړي.
طالبانو پرون د پروان ولايت په مرکز چاریکار ښار کې له داعش سره د نښتې خبر ورکړی و.
دا په داسې حال کې ده، چې په وروستيو کې د ملګرو ملتونو په ګډون يو شمېر هېوادونه په افغانستان کې د داعش ډلې د خطر زیاتیدو خبر ورکوي، خو طالب چارواکي یې څرګندونې بې بنسټه بولي.