تاند (چهارشنبه، د حوت ۱۱مه) روسیې د دې لپاره چې خپل ولس ته د اوکرایني مشرانو د پیغامونو د رسېدو مخه ونیسي پرون (سې شنبې) د اوکراین په پلازمېنه کې د تلویزیون تر ټولو لوړ انتن په نښه کړ.
د روسیې د جنګي الوتکو له لوري د کییف په مرکزي برخه کې د تلویزیون پر انتن له بمبارۍ وروسته د اوکراین د دولتي تلویزیون ځینې خپرونې پرچاو شوې.
د اوکراین د کورنیو چارو وزارت وویل چې برج یا انتن ته زیان اوښتی او یو شمېر تلویزیوني چاینلونه به تر یوه وخته کار نه شي کولی.
روسیه هڅه کوي چې د اوکراین له حکومت څخه تبلیغاتي وسایل واخلي. اټکل کېږي چې روسیه به په اوکراین کې د انترنیټ د قطع کېدو هڅه هم وکړي ځکه چې اوس تر تلویزیون هم انترنیټ مهم دی او ډېر خلک معلومات د انترنیټ له لارې ترلاسه کوي.
خو په همدې منځ کې د نړۍ تر ټولو لوی ملیاردر او د سپېس ایکس خاوند ایلن ماسک غواړي چې د سټارلینک په نوم د سپوږمکۍ سیستم له لارې انترنیټي خدمات اوکراین ته برابر کړي.
په دې اساس، که روسیه د اوکراین انترنیټ پرچاو هم کړي، د دغه هیواد خلک به له له سپوږمکۍ څخه لا غښتلی او وړیا انترنیټ ولري.
ماسک ویلي چې نور وسایل لېږي چې اوکراینیان د روسیې د یرغل په لړ کې له انترنیټ څخه کار واخلي. ده نه دي ویلي چې څه ډول وسایل چیري لېږي.
خو ویل کېږي چې د ایلن ماسک دا کار له اوکراینیانو سره د روسانو د یرغل په وړاندې د هغوی د روحیې په لوړولو کې مهم رول لوبولی شی.
د ایلن ماسک سپېس ایکس شرکت له ډېر وخت راهیسې فضا ته سپوږمکۍ لېږي څو درستې نړۍ ته د هوا له لارې انترنیټ ورسوي. د دې پروژې د بشپړېدو په صورت کې به د افغانستان په شان په وچه کې ایسار هیوادونه ګاونډیو هیوادونو ته محتاج نه وي چې د انترنیټ لپاره هغوی ته پیسې ورکړي.