تاند:(سې شنبه، د کب لسمه) د پښتون ژغورنې غورځنګ رهبر منظور پښتین د طالبانو له لوري په خوست کې د هغو ځوانانو په نیول کیدو غبرګون وښود، چې ويل کيږي د ښاغلي پښتین، ولسمشر غني او افغان ملي بیرغ په نومونو د نیالګیو کښېنولو له کبله بندیان شوي دي.
ښاغلي پښتین په سند ایالت کې د پښتون ژغورنې غورځنګ د يوه مخکښ غړي علي وزیر د خوشې کیدو لپاره د پیل شوي پرلت په غونډه کې نن وویل، چې که طالبان په خوست کې نیولي ځوانان خوشې نه کړي، دوی به یې په اسلام اباد کې د سفارت مخې ته د عدالت غوښتنې پرلت پیل کړي.
هغه تور ولګاوه چې د طالبانو د دغه عمل تر شا د پاکستان لاس دی او ويې ويل چې پاکستان د ډیورنډ کرښې دواړو غاړو ته پښتانه محکوم کړي دي.
منظور پښتین طالبانو ته په خطاب کې وویل:«تاسې له يوې ونې سره د یوه نوم د لیدو زغم نه لرئ، لوی حکومت به څنګه وچلوئ؟»
په افغانستان کې د طالبانو واکمن حکومت نه د منظور پښتین څرګندونو او نه د خوست د بندي کړو یو شمېر ځوانانو د نیول کیدو موضوع ته غبرګون ښودلی.
په ټولنیزو رسنیو کې د یو شمېر نیول شویو ځوانانو عکسونه خپاره شوي، چې سرونه يې خرييل شوي او په توهین آميزه بڼه یې په غاړو کې د افغانستان څیرل شوي ملي بیرغونه پراته دي.
د طالبانو دغه عمل په پراخه کچه غندل شوی دی.
په خوست کې د طالبانو والي محمد نبي عمري څو ورځې مخکې خبرداری ورکړی و چې خوستيان باید تر درېیو ورځو د افغانستان ملي بيرغ له خپلو هټيو، کورونو او موټر سايکل او موټرو څخه ليرې کړي.
طالبان په دې ډول هڅه کوي چې خپل کفن ډوله تنظیمي بیرغ پر خلکو د ملي بیرغ په ځای تحمیل کړي.