تاند(دوشنبه، د حوت ۹ مه) د نړۍ تر ټولو لویه باري (کارګو) الوتکه، انتونوف -۲۲۵ پر اوکراین د روسیې د یرغل په څلورمه ورځ کییف ته نژدې ویجاړه شوه.
د اوکراین (Ukroboronprom) دولتي شرکت پرون (یکشنبه) وویل:«یرغلګرو پر اوکراین د بلوسې په ترڅ کې زموږ اې این – ۲۲۵ انتونوف الوتکه کییف ته نژدې په ګوستومیل هوايي ډګر کې وویشته او ویجاړه یې کړه.»
دا الوتکه په نړۍ کې بې سارې وه ځکه چې ۸۴ متره اوږده وه او تر ۲۵۰ ټنه بار یې په ساعت کې په ۸۵۰ کیلومتر سرعت کې وړلی شو.
پر دې الوتکه یې مریا (Mriya) نوم ایښی و چې په اوکرایني ژبه خوب یا رویا ته وايي.
د اوکراین د باندنیو چارو وزارت پرون له دې پېښې وروسته پر خپله ټویټرپاڼه ولیکل:«روسیه به زموږ مریا ویجاړه کړي، خو هیڅکله به د غښتلي، خپلواک او ولسواک اروپايي دولت په توګه زموږ خوب ویجاړ نه کړای شي، موږ یې مخه نیسو.»