تاند: ( دوشنبه، د کب نهمه) د طالبانو د حکومت وياند ذبیح الله مجاهد پرون په یوه خبري کنفرانس کې په کابل ښار کې د وروستیو دوو ورځو چاڼیزو عملیاتو لاسته راوړنې له رسنیو سره شریکې کړې.
مجاهد وويل، چې دغه عملیات په بشپړې همغږۍ او احتیاط سره روان دي.
ذبیح الله مجاهد د دغو چاڼیزو عملیاتو موخه په کابل ښار او شاوخوا ولایتونو کې یې د بشپړ امنیت تامینول او له مغرضو او شریرو کړیو، انسان تښتوونکو، لوټمارو او غلو څخه د ښار پاکول وبلل.
ذبیح الله مجاهد د دغو چاڼیزو عملیاتو موخه په کابل ښار او شاوخوا ولایتونو کې یې د بشپړ امنیت تامینول او له مغرضو او شریرو کړیو، انسان تښتوونکو، لوټمارو او غلو څخه د ښار پاکول وبلل.
هغه همدارنګه له ټولو هېوادوالو په ځانګړې توګه کابل ښاریانو څخه غوښتنه وکړه چې د دغو عملیاتو په ترسره کولو کې د طالبانو له ځواکونو سره همکاري وکړي او ډاډ یې ورکړ چې دغه عملیات د هېچا په زیان نه دي.
مجاهد په کابل کې د دوو ورځو چاڼیزو عملیاتو لاسته راوړنې داسې بیان کړې: د دوی ځواکونه تر اوسه توانېدلي دي چې ۱۳۳ کلاشینکوفونه، ۹ کرینکوف، ۵ کلکوف،۳ ایم۴، ۱۸۱تومانچې،۲ کره بین،۴۴ توغندي، د توغندي ۸۵ ګولۍ، ۷ پیکاوې، یوه داشکه، دوه درازکوف، د دوه اتیا- ۱۰۷ ګولۍ، ۲۰ لاسی بمونه، ۳۶ چسپکي او غیر چسپکي ماینونه، ۱۳ ټنه بارود، ۸۹ ګرنیت، ۲۱ یوولس ډزې، ۳ ډرون کامرې، ۴ رنجر، ۴۴ موټر، ۱۳ زغره وال موټر، ۳ زغره وال لنډکروزر، یو هایلکس، ۶۴ کوچنۍ او ۱۲ غټې مخابرې او سټلایټ، یو ماین پال، د هاوان یو دروبین، ۵۶ دوربینونه، ۴۲ جامر او همدارنګه ۶۰ زره ۳۸۶ بېلابېلې مرمۍ کشف او ترلاسه کړي.
دغه راز تراوسه ۹ انسان تښتوونکي، ۶ داعشیان او ۵۳ حرفوي غله له حکومتي اجناسو سره نیول شوي او د میر حمزه په نامه یو ډاکټر او د میرویس په نامه یو بل کس د تلاشۍ په وخت کې د انسان تښتوونکو له منګولو څخه آزاد شوي دي. دغه راز دوه ۱۲ کلنې او ۱۳ کلنې نجونې هم د انسان تښتوونکو له منګولو څخه ژغورل شوې دي.
د طالبانو د حکومت ویاند دغه راز د امریکا د متحدو ایالاتو د مالیې وزارت له خوا د ځنیو محدویتونو د لرې کولو مننه وکړه او پر افغانستان یې د نورو محدویتونو د لرې کولو غوښتنه وکړه.
هغه دغه اقدام د دواړو هېوادونو د اړیکو په ټینګښت کې اغېزمن وباله او څرګنده یې کړه چې د طالبانو حکومت د نړۍ له ټولو هېوادونو سره ښې او مثبتې اړیکې غواړي.
په همدې حال ذبیح الله مجاهد، د افغانستان له خلکو سره د هند د ۵۰ زرو ټنو غنمو بشري مرستو مننه وکړه او دغه راز د دغو مرستو په انتقال کې یې د پاکستان له همکاریو قدرداني وکړه.
ذبیح الله مجاهد، د افغانستان ټولو خلکو په ځانګړې توګه کابل ښاریانو ته ډاډ ورکړ چې پیل شوي عملیات د غوره امنیت د ټینګښت لپاره دي او ټینګار یې وکړ چې په عملیاتو کې د ګذر د وکیل او د جومات د ملا امام له شتون پرته هېڅوک د پلټنې اجازه نلري.
دا څرګندونې په داسې حال کې دي، چې د طالبانو د يادو عملياتو د هرکلي ترڅنګ په دې اړه منفي غبرګونونه هم څرګند شوي دي.
د افغانستان لپاره د اروپايي ټولنې ځانګړي استازي دغه عمليات د خلکو پر خصوصي حريم د تېري او د دوی د ځورونې له کبله « جنایت» ګڼلی او د ودرولو غوښتنه یې کړې ده.