تاند(جمعه، د حوت ۶ مه) د ط حکومت وايي چې درې ګونو امنیتي اورګانونو یې په کابل ولایت او شاوخوا سیمو کې د جنایتکارانو او اشرارو د تصفیه کولو لپاره عملیات پیل کړي دي.
د طالبانو د حکومت ویندوی ذبیح الله مجاهد په یوه خبرپاڼه کې ویلي چې د دفاع او کورنیو چارو وزارتونو او د ملي امنیت (استخباراتو) ځواکونو د دې ګډو عملیاتو قومانده د دفاع وزارت د مرستیال ملا فاضل مظلوم په غاړه ده.
د ښاغلي مجاهد په وینا د دغو عملیاتو هدف د هغو برمته ګرو، مجرمانو او اشرارو نیول او له منځه وړل دي چې مخکې تر مخکې د طالبانو له لوري پېژندل شوي او تر تعقیب لاندې دي.
مجاهد دا هم ویلي چې له ډېر احتیاطه به کار اخیستل کېږي چې د عملیاتو په ترڅ کې عام ولس ته زیان وانوړي.
ده د کابل ولایت او شاوخوا سیمو له اوسېدونکو غوښتي چې د معلوماتو په ورکولو کې له طالب ځواکونو سره همکاري وکړي.
د طالبانو د ویندوی په وینا دا عملیات د کابل ښاریانو، سوداګرو او د افغانستان د نورو خلکو د امنیت د ښه کېدو لپاره کېږي.