تاند (جمعه، د حوت ۶ مه) په داسې حال کې چې روسي ځواکونه د اوکراین پلازمېنې کییف ته نژدې شول، کریملین وویل چې د روسیې ولسمشر ولادیمیر پوتین له اوکراین سره د خبرو لپاره چمتو دی چې بیلاروس ته یو پلاوی ولېږي.

د کریملین ویندوی دیمیتري پیسکوف نن پر اوکراین د روسي ځواکونو د یرغل په دوهمه ورځ وویل، د روسیې ولسمشر حاضر دی چې د بیلاروس په پلازمېنه کې له اوکرایني پلاوي سره د خبرو لپاره جګپوړی پلاوی ولېږي.

تر دې پخوا هم د بیلاروس پلازمېنه مینسک د روسیې او اوکراین ترمنځ د خبرو کوربه توب کړی و.

د روسیې زرګونه پوځیان په بیلاروس کې مېشت دي او اوکراین وايي چې پر دغه هیواد یرغل د بیلاروس په شمول له څو خواوو شوی دی.

د اوکراین ولسمشر ولودیمیر زیلینسکي په وروستیو اوونیو کې څو ځلې له روسیې سره د خبرو غوښتنه کړې وه.

نن په داسې حال کې چې روسي ځواکونه د اوکراین پلازمېنې ته نژدې شول، ولسمشر زیلینسکي خپل ملت ته په وینا کې وویل:

«غواړم چې د روسیې د فدراسیون ولسمشر ته یو وار بیا ووایم. د اوکراین په ټولو برخو کې جګړه روانه ده. راځئ چې د خلکو د وژنو د مخنیوي لپاره خبرو ته کښېنو.»

د اوکراین د چارواکو له څرګندونو داسې ښکاري چې دا هیواد حاضر دی چې د روسیې له لوري د جګړې د بس کېدو په شرط په ناټو کې د نه شاملېدو تضمین ورکړي او بې طرفه پاتې شي.

په همدې حال کې پوتین د اوکراین له پوځ څخه وغوښتل چې له روسیې سره خبرې وکړي او د اوکراین حکومت ته، چې ده «نازي ګانګ» وباله شا واړوي.

پوتین د جمعې په ماسپښین د اوکراین پوځ کودتا ته وهڅاوه، او هغه ته په خطاب کې یې وویل:«دا به زموږ لپاره لا اسانه شي چې تاسو په خپله واک په لاس کې ونیسئ.»