تاند- د افغانستان کرکټ بورډ د ملي لوبډلې پخوانی لوبغاړی نورالحق ملکزی د لوبغاړو د غوراوي د چارو مشر وګوماره.
وروسته له دې چې درې میاشتې پخوا اسدالله خان استعفا ورکړه، ملکزی د غوراوي د کمېټې د سرپرست په توګه کار کاوه.
ملکزی په دې ستایل شوی چې د ۲۰۲۲ تر نولس کلونو د کشرو نړیوال جام ته یې ښه لوبډله غوره کړې وه.
ده د افغانستان لپاره په ۲۰۱۰ او ۲۰۱۲ کلونو کې په دوو نړیوالو سیالیو کې برخه اخیستې ده.
تر دې مخکې کرکټ بورډ پخوانی اسټرالیايي لوبغاړی (سټوارټ لا) د بنګله دېش په وړاندې د سیالیو لپاره د ملي لوبډلې موقت سر روزونکی وګوماره.
سټوارټ لا په نوي یمه لسیزه کې د اسټرالیا د ملي لوبډلې توپ وهونکی و.
ده یوه موده د سریلانکا او بنګله دېش د ملي لوبډلو د روزونکي په توګه کار کړی.
ټاکل شوې چې افغانستان او بنګله دېش د روانې فبروري میاشتې په ۲۳مه، ۲۵مه او ۲۸مه نېټ درې یو ورځنۍ او د راتلونکې مارچ میاشتې په درېیمه او پنځمه دوه شل اووره سیالۍ وکړي.