تاند: ( چار شنبه ، د دلوې اووه ویشتمه) د افغانستان پخواني ولسمشر حامد کرزي په يوه تازه مرکه کې يو ځل بيا له طالبانو غوښتي، چې د حکومت د په رسميت پېژندلو له غوښتنو يې مخکې بايد د افغانستان د راتلونکي په اړه د پریکړو په موخه لویه جرګه جوړه کړي.
کرزي د فرانسې یوه خبري اژانس ته ويلي، چې په لویه جرګه کې باید افغانان د خپل راتلونکي په اړه بحث او خبرې اترې وکړي.
نوموړي بيا يادونه کړې، چې ده او ډاکټر عبدالله د لویې جرګې د بللو په اړه رسما طالبانو ته خپله غوښتنه وړاندې کړې ده.
طالبانو په دې اړه څه نه دي ويلي، خو څو ورځې مخکې یې وياند ذبيح الله مجاهد د لویې جرګې د بللو په اړه د حامد کرزي او ډاکټر عبدالله د غوښتنې په تړاو وويل چې په دې اړه به غور وشي.
طالبانو مخکې ویلي وو، چې د هېواد د وضعیت په اړه د مشورو په موخه به د علماوو یوه لویه غونډه وغواړي.