تاند(چهارشنبه، د دلوې ۲۷ مه) د طالبانو حکومت د احصايې او معلوماتو ملي ادارې نن وویل چې په تېرو شپږو مياشتو کې يې شاوخوا يو ميليون الیکترونیکي تذکرې ويشلي دي.
د دې ادارې ویندوی محمد حليم رافيع وويل، د افغانستان په ۳۴ ولايتونو کې الیکترونیکي تذکرې د پخوا په شان په عادي ډول وېشل کېږي.
د ښاغلي رافيع په وینا، اداره یې د ورځې په متسوط ډول له ۱۶ زرو تر ۱۸ زرو پورې تذکرې ويشي.
دا په داسې حال کې ده چې د طالبانو تر واک ته رسېدو مخکې د تېر نظام په مهال د ورځې ۲۵ زره تذکرې ویشل کېدې. په دې حساب به تراوسه پورې نژدې ۴ ملیونه تذکرې وطشل شوې وای.
ښاغلی رافیع وایی، د الیکترونیکي تذکرو لپاره انلاين سيسټم هم په عادي ډول فعال دی او خلک له دې لارې لا پ ه اسانه تذکره ترلاسه کولی شي.
د طالبانو له واک ته رسېدو وروسته د الیکترونیکي تذکرو او پاسپورتونو په توزیع کې بیا بیا خنډونه پېښ شول. طالب چارواکي د دغو خنډونو علت په وسایلو کې خرابوالی او د متقاضیانو زیاتوالی ښيي.
په همدې حال کې د پاسپورت ریاست وايي چې له دې ایسته به په پلازمېنه کابل کې یوازې هغو کسانو ته پاسپورت ورکوي چې د کابل تذکره ولري.
دا په داسې حال کې ده چې په کابل کې د نورو ولایتونو لسګونه زره اوسېدونکي اوسي.
د پاسپورت عمومي رییس علم ګل حقاني پر خپل یوټیوب چاینل په خپور کړي ویډیويي پیغام کې ویلي، د نورو ولایتونو اوسېدونکي دې په خپلو ولایتونو کې پاسپورتونه ترلاسه کړي.
د پاسپورت ریاست له څو میاشتو راهیسې بند و او تازه پرانیستل شوی دی خو په محدوده پیمانه پاسپورټونه صادروي.
ترهغه ځایه چې زه خبر یم الوکوزیان پختانه دي په دغه تذکره کې څرنګه ددې ورور قوم تاجک لیکل شوی ؟ داده احسایې په دفترونو کې ډیری مامورین فارسي ژبې دي هسې نه چې له چل او ول نه کارخلي او په دې ترتیب دتاجکانو شمیر لوړه وي . که یو څوک په دری ژبه خبرې کوی مطلب دانه ده چې هغه به هرمرو تاجک وي. طالبان باید دې چلونو ته پام وکړي.