تاند: ( سې شنبه ، د دلوې شپږ ویشتمه) د مایکل مک په مشرۍ د امريکا متحده ايالاتو د سنا جرګې د بهرنیو اړیکو کمېټې په افغانستان کې د جمهوري نظام د سقوط له شپږ مياشتيني کیدو سره د دغه سقوط په تړاو ګډه اعلاميه صادره کړې ده.
په اعلاميه کې د یاد شوي نظام د سقوط یو عمده دليل له افغانستان څخه د امریکايي ځواکونو د نا مسوولانه وتو په اړه د ولسمشر بایډن پریکړه ښودل شوې ده.
د امريکا سنا جرګې ياده پرېکړه ناسمه او د پټو سترګو کار ګڼلی او ويلي، چې د افغان جمهوري نظام سقوط « سيستماتيکه بڼه» لرله.
امريکايي سناتورانو په دې اعلاميه کې له افغانستان څخه د جمهوري نظام له سقوط وروسته، د کابل هوايي ډګر نه د افغانانو د تخلیې بهير او په الوتکو پسې د خلکو د منډې وهلو عکسونه لړزونکي او د امريکا د حیثیت په زیان یاد کړي.
سناتورانو نیوکه کړې، چې د افغانستان د نظام د سقوط شپږ مياشتې کيږي، خو تر اوسه هيڅ امریکايي مقام په دې ماتې کې خپله پړه نه ده منلې، چې دا یې په وینا حیرانوونکې ده.
د امريکا حکومت بیا له افغانستان څخه د خپلو ځواکونو د ويستو د پریکړې ننګه کړې او ويلي، چې
د دغه هېواد په جګړه کې هره اونۍ د امریکا یو میلیارد ډالره تاوان و او جګړه پای ته نه رسیده.
امريکايي ولسمشر څه موده مخکې وویل، چې په افغانستان کې د ځواکونو د ويستو له کبله بښنه نه غواړي.