تاند: ( سې شنبه ، د دلوې شپږ ویشتمه) د پلازمېنې کابل په ګډون د افغانستان په بېلابېلو ولايتونو کې نن زرګونه افغانانو د لاریونونو له ترسره کولو سره د خپلو بانکي زېرمو د برخليک په اړه د امریکا د ولسمشر پریکړه وغندله.
لاريون والو د بېلابېلو شعارونو له ورکولو سره جوبایډن د افغانستان د بانکي زېرمو غل وباله او د دې زېرمو په اړه د بايډن پريکړه د نه منلو وړ وباله.
لاریون والو دغه راز غوښتنه وکړه، چې یادې بانکي بايد خوندي وساتل شي او د طالبانو په ګډون یې هیڅوک د ورځینیو لګښتونو لپاره د استفادې حق ونه لري.
په لاریونونو کې یادې زېرمې د افغانستان د خلکو شتمني وګڼل شوې او ټینګار وشو، چې د سپټمبر د یوولسمې پېښې پړه باید پر افغان ولس وانه چول شي او تاوان هم دوی نه ونه غوښتل شي.
د امریکا د ولسمشر جو بایډن له لوري د صادر شوي فرمان پر اساس، په امریکا کې د افغانستان ۷ ملیارد ډالره کنګل شوې پیسې په دوو برخو ووېشل کېږي چې یوه یې په افغانستان کې پر بشري چارو لګول کېږي او بله د سپټمبر د تروریستي حملو د قربانیانو خپلوانو ته د غرامت په توګه ورکول کېږي.
اکثره افغانان او حتي ځینې امریکایان دا پرېکړه نامنصفانه بولي او وايي چې د سپټمبر د تروریستي حملو ټول عاملان د عربي هیوادونو وګړي وو، نه افغانان او د القاعده شبکې مشر اسامه بن لادن هم په پاکستان کې ووژل شو.