تاند: ( دوشنبه ، د دلوې پینځه ویشتمه) د طالبانو حکومت تاييد کړه، چې د پخواني ولسمشر حامد کرزي او د مخکیني حکومت د مصالحې شورا د رییس ډاکټر عبدالله لیک یې تر لاسه کړی.
د طالبانو د حکومت ویاند ذبیح الله مجاهد وايي، دوی ګوري چې د دې وړاندیزونو ګټه د افغانستان خلکو او د طالبانو حکومت ته څه ده او که خیر په کې و بیا به عملي شي.
طالب وياند زياتوي، د افغانستان ټول سیاسي مشران حق لري چې د افغانستان اوسني حکومت سره خپلې مشورې شریکې کړي.
حامد کرزي پرون بيا وویل چې ده او عبدالله په ګډه د طالبانو له حکومت څخه په یوه لیک کې بهر ته د تللو افغان سیاسیونو د بیرته رانګ د زمینه برابرولو غوښتنه کړې ده.
د طالبانو د وياند څرګندونې په داسې حال کې دي، چې روانه اونۍ د جمهوري نظام يو مهم چارواکی عبدالسلام رحيمي له بهر څخه بیرته کابل ته ستون او د طالبانو له یو شمېر مهمو چارواکو سره ولیدل.
معلومه نه ده، چې د طالبانو غبرګون به د حامد کرزي او ډاکټر عبدالله لیک ته څه وي؟