تاند: ( يکشنبه ، د دلوې څلور ویشتمه) په ننګرهار کې د طالبانو ځايي چارواکي وايي، چې په دې ولايت کې يو انسان تښتوونکی د دوی ځواکونو سره په نښته ووژل شو او دوه ژوندي ونيول شول.
په ننګرهار کې د طالبانو د والي د وياند دفتر ويلي، چې د طالبانو د استخباراتو رياست ځانګړو ځواکونو د خوږياڼو ولسوالۍ مربوطاتو کې يو انسان تښتوونکی د مقاومت پر مهال وژلی او دوه يې وسلو او مهماتو سره ژوندي نيولي دي.
سرچينې په دې اړه نور جزییات نه دي ورکړي.
له څه مودې راهيسې د کابل په ګډون یو شمېر ولایتونو کې د انسان تښتونې د پېښو د زیاتېدو خبرونه ورکړل شوي.
له دې سره، هم مهاله طالب چارواکو د انسان تښتونې په تور د ګڼو کسانو د نیولو او له منګولو یې د یو شمېر تښتول شویو کسانو د خوشې کیدو خبر ورکړی.