تاند: ( يکشنبه ، د دلوې څلور ویشتمه)‏ ‏‏‏د طالبانو کورنیو چارو وزیر سراج الدین حقاني نن د سقوط شوي جمهوري نظام له لوړپوړي چارواکي عبدالسلام رحيمي سره وکتل

د طالبانو د کورنیو چارو وزارت په اعلامیه کې راغلي، چې خليفه سراج‌الدين حقاني د عبدالسلام رحيمي وطن ته په راتلو هرکلی وکړ او ويې ويل: افغانستان د ټولو افغانانو ګډ کور دی او ټول افغانان حق لري چې په افغانستان کې ډاډه ژوند وکړي.

‏نوموړي له عبدالسلام رحيمي وغوښتل چې د سولې او خواخوږۍ پيغام  يې نورو هغو وطنوالو ته هم ورسوي چې له هيواده وتلي.

د طالبانو په اعلامیه کې راغلي، چې رحيمي له سراج الدين حقاني څخه مننه او د سولې او ورورولۍ د پیغام ستاینه یې وکړه.

عبدالسلام رحيمي، چې د بې واکه شوي ولسمشر محمد اشرف غني د دفتر لوی رییس او وروسته د سولې په چارو کې د دولت وزير او د ولسمشر ځانګړی استازی و، پرون ېې د طالبانو يو شمېر نورو لوړپوړو چارواکو په بهرنيو چارو وزارت کې د هېواد ته ستنیدو هرکلی وکړ.