تاند: ( دوشنبه ، د دلوې اتلسمه) د طالبانو د تحریک سیاسي مرستیال ملا عبدالغني برادر پرون رسماً د طالبانو د حکومت د رييس الوزرا د اقتصادي مرستیال په توګه معرفي شو.
د نوموړي د معرفۍ په مراسمو کې د طالبانو د کابینې غړو او د اقتصادي وزارتونو او مستقلو دولتي شرکتونو مشرانو ګډون کړی و.
په دې مراسمو کې ملا برادر اخوند وویل:(( د تېر ۲۰ کلن اشغال پر مهال د هیواد د اقتصادي ودې لپاره هېڅ بنسټیز کار نه دی شوی او د پراخ فساد له امله یې سخته ضربه لیدلې. ))
برادر زیاته کړه، د طالبانو حکومت د هیواد د اقتصادي بیارغونې لپاره له اړوندو ارګانونو سره په همغږۍ کار کوي او کوښښ کوي چې نور افغانستان پر خپل ځان بسیا واوسي.
د طالبانو د ریاستالوزراء اداري مرستیال مولوي عبدالسلام حنفي وویل:د طالبانو حکومت د ټولو اقتصادي پروژو ملاتړ کوي او هڅه کوي چې فساد له منځه یوسي.
یادې غونډې ته د کانونو او پټرولیم وزیر شیخ شهاب الدین دلاور وویل: افغانستان د کانونو له پلوه غني هیواد دی او دوی هڅه کوي چې په ښه ډول دغه کانونه استخراج او د هیواد په اقتصادي بیارغونه کې ترې کار واخلي.
طالب وياندويانو نه دي ويلي، چې ملا برادر په دې مراسمو کې د چا له لوري خپلې دندې ته معرفي شوی دی.
طالب وياندويانو مخکې نوموړی د طالبانو د رييس الوزرا لومړی مرستیال باله.
د ملا برادر دفتر اوس هم د نوموړي دفتر ته د « لومړي معاونيت» اصطلاح کاروي.