تاند: ( یکشنبه ، د دلوې اوولسمه) د طالبانو چارواکي وايي، چې کونړ پېج درې ولسوالۍ په وډیګرام سیمه کې د ټولګټو چارو وزارت له بودجې د درې نیمو میلیونو امریکايي ډالرو په لګښت د یو پل رغولو چارې پيل شوې.
چارواکو په دې اړه خپره کړې لنډه اعلامیه کې نور جزییات نه دي ورکړي.
له دې اعلاميې سره د طالبانو د يو شمېر ځايي چارواکو او قومي مشرانو هغه ګډ عکسونه هم خپاره شوي، چې د ياد شوي پول د چارو د پیل پرانیسته کوي.
کونړ د افغانستان له غره ییزو ولایتونو څخه دی، چې تر اوسه یې د پلونو او سړکونو په وسيله د اتصال ستونزه په بشپړه توګه نه ده حل شوې.
ځایي خلکو د بیارغونې د دې نوې پروژې د چارو په پیل خوښي ښودلې ده.