تاند: ( چار شنبه ، د دلوې ديارلسمه) د بلخ ولايت د مرکز مزارشريف ملکي روغتون ته له تېرې يوې مياشتې راهيسې تر پینځلسو پورې د وژل شويو مېرمنو جسدونه وړل شوي.
په دې روغتون کې سرچينې وايي، چې جسدونه طالبانو ورته ور وړي او دوی یې د څېړنې اجازه نه لرله.
سرچينه زياتوي، چې دغه مېرمنې تر ډېره په سر او سینو کې په ګوليو ويشتل شوي شوې وې.
د پیک افتاب خبري اژانس د راپور په حواله، معلومه نه ده چې دا مېرمنې چا وژلې دي؟
د ښځو د حقونو فعالان او نړيوال بنسټونه ډېر ځله طالبان د ورته وژنو عاملين ګڼي، خو طالبان په دې اړه تورونه ردوي.
په بلخ کې يوې سرچينې ياد شوي خبري اژانس ته ويلي، چې څو ورځې مخکې طالبانو د يوه جمهوري پوليس مور په دې پلمه له کوره ويستې، چې مرسته ورسره کوي، خو په سبا يې وژل شوی جسد د مزار شريف ابو علي سينا حوزوي روغتون ته لېږدول شوی.
د طالبانو د بيا ځلي واکمنۍ په لومړیو ورځو کې ویل شوي وو، چې دغې ډلې ډېرې مېرمنې د « نا روا جنسي اړيکو» په تور وژلې دي.
څو ورځې مخکې د ملګرو ملتونو سرمنشي د دغه سازمان د امنيت شورا په غونډه کې هغه راپور تاييد کړ، چې طالبانو په تېرو څو مياشتو کې د جمهوري نظام تر سلو ډېر منسوبين وژلي دي.
طالبانو بيا دا راپور بې بنسټه وباله.