تاند: ( سې شنبه ، د دلوې دولسمه) د افغانستان لپاره د روسیې د ولسمشر ځانګړي استازي ضمير کابلوف په راتلونکي پسرلي کې د طالبانو پر وړاندې په افغانستان کې د خونړي مقاومت وړاندوینه کړې ده.
کابلوف په يوه تازه مرکه کې ويلي، چې له شک پرته به راتلونکی پسرلی د قومي نفاق له کبله په افغانستان کې خونړی طالب ضد مقاومت وزيږوي.
روسي استازي په دې مرکه کې د دغه پيش بيني شوي وضعیت پر وړاندې د خپل هېواد ممکنه دریځ نه دی په ډاګه کړی.
ضمير کابلوف په داسې مهال دا څرګندونې کړي، چې څو اونۍ مخکې د روسیې پلازمېنې مسکو ته د طالبانو د رييس الوزرا د لومړي مرستيال ملا برادر او دغه راز د طالبانو د دفاع د وزیر ملا یعقوب مجاهد د سفر خبر ورکړ.
په راپورونو کې روسیې ته د څو طالب ضدو څېرو: امرالله صالح، احمد مسعود او صلاح الدين رباني د سفر خبر هم ورکړل شوی و، خو ضمير کابلوف د دواړو افغان جنګي ډلو د استازو سفر او د روسیې په منځګړتوب یې د سولې د مذاکراتو د ترسره کيدو خبر رد کړی و.
معلومه نه ده، چې د روسیې ځانګړي استازي له نویو څرګندونو څخه څه موخه لرله.
روسیه لا له وړاندې تورنه وه، چې په افغانستان کې په هم مهاله ډول د طالبانو او شمال مقاومت ډلو ملاتړ کوي او د خپلو لويو موخو لپاره یې د اړتيا پر وخت خپلمنځیو جګړو ته هم را کاږي.